СУ ҮСТІНДЕГІ ШАРДАРАЛЫҚТАР СУСЫЗ ОТЫР - Қазыбек Иса


Новости / 11 янв 2024 12

Қазақстан Республикасы Парламенті Мәжілісінің депутаты, Қазақстанның еңбек сіңірген қайраткері, ақын, «Ақ жол» партиясы төрағасының орынбасары Қазыбек Иса Түркістан облысы Шардара ауданының тұрғындарымен кездесу өткізді.

М.Әуезов атындағы жалпы орта мектепте және Шардара ауданы әкімдігінің ғимаратында өткен кездесу барысында Қазыбек Иса «Ақ жол» партиясының қызметі туралы айтып берді. Қатысушылар офшорлық аймақтардағы қаражатты қайтаруға байланысты мәселелерді, қаңтар айында триллиондаған теңге бөлінгеніне қарамастан, негізсіз жабылған жағдайларды, таза сумен, сыбайлас жемқорлықпен, отандастарымыздың қоныс аударуының баяу қарқынымен және азаматтық алу үшін құжаттарды жинау процесінің күрделілігімен байланысты мәселелерді талқылады. Сонымен қатар, ҚР Президенті Қасым-Жомарт Тоқаевтың «Егемен Қазақстан» газетіне берген сұхбатына қатысты пікір айтылды.

“Қандастарымыз өз еліне келетін болса, 46 құжат жинау керек екен. Бір құжатты жинап бастаса, екіншісі жарамсыз бола бастайтын. Біз бұл мәселенің оң шешілуіне атсалыстық. Қазір заң қабылданып жатыр. Азаматтық алудағы үлкен кедергі ұлтының “Қазақ” екендігі туралы анықтаманы жергілікті өкілеттік орган беретін болады”,- дейді Қазыбек Иса.

Аудан әкімдігі ғимаратында өткен жиналыста аудан тұрғындары зиялы қауым өкілдерімен бірге шешілмеген бірқатар мәселелерді талқылады. Қатысушылардың бірі мақта шаруашылығы саласындағы заңнаманы енгізу, сондай-ақ ауыз суға, сарқынды суға, Тама-Тастанбекке таза су қорларын тартуға және тұрғын үйлерді газдандыруға байланысты мәселелерді қарау туралы өтініш білдірді.

“Қазыбек Иса, сенің әр сөзіңді, ісіңді қадағалап отырамыз, ризамыз. Таза су - денсаулық кепілі. “Өткенде Парламентте өткен үкімет сағатында “Триллиондар жұмсалса да, таза су мәселесін шеше алмау - таза масқара” деп халық үнін жеткізгеніңе алғысымыз зор. “Су үстінде отырған Шардаралықтар суға зар болып отыр” деп өзіңнің туған жеріңнің өзекті мәселесін өткір көтеріп жатсың, көп рахмет! Мына жиналған халық сол өзің көтерген “Тама Тастанбектегі” таза суды халыққа жеткізуді сұрайды. Жан жақтан сұрастырып жатырмыз. 16 млрд бөлінген дейді, бірақ әлі қағаз жүзінде екен. Сол таза судың Шардаралықтардың үйіне жетуіне атсалыс, айналайын”,- дейді қала тұрғыны Таңсықбай Сахов.

Қазыбек Иса Шардарадағы ауыз су мәселесі таза су қорын игеру жөніндегі әріптесі, Мәжіліс депутаты Қайрат Балабиевпен бірге талқыланып жатқанын хабарлады. Олар осы мәселе бойынша Үкіметке хат жолдап, оны тұрақты бақылауда ұстап тұру және оны тез арада шешуге жәрдемдесу ниетін білдірді.

Бұдан бөлек, басқосуда экология, Көксарайдан су бөгетінен шығып жатқан қалың шыбын-шіркейді азайту, газ жеткізу мәселелерін де тұрғындар ортаға салды. Ең маңызды сауал шардаралықтар мақта заңын бекітуді талап етіп отыр.

“Түркістан облысы бойынша 32 000 шаруашылық мақта егумен айналысады. Бас-аяғы 80 000 шаруашылық бар. 1 млн халық мемлекеттен айлық алмайды, диханшылықпен айналысады. Зейнетақы мен салық құяды. Мемлекеттен бөлінген қаржылар, халықтың қолына толық жетпей жатыр. Осы мәселені шешу үшін Астанаға алты рет бардым. Қаншама министрдің алдына кірдім. Бірақ, шешімін таппай жатыр. Мақтанының заңын орнатуға көмек берсеңіз. Түркістан облысы бойынша 110 мың гектар жерге мақта егіледі. 77 млрд ақша бөлінеді, соның 35 млрды ғана шаруаларға жетіп отыр. Қалғаны қайда?”,- дейді әлі тіркелмеген Мақташылар мен диханшылар одағы төрағасының орынбасары Жора Бейсен.

Аудандық қоғамдық кеңестің төрағасы, еңбек ардагері Қыстау Ілесов отандастарымызды бүкілхалықтық дауыс беру барысында «2023 жылдың үздік депутаты» номинациясында жеңімпаз атануымен құттықтады. Кездесу соңында Қазыбек Иса азаматтардың жеке қабылдауын өткізіп, олардың ұсыныстарын тыңдады. Атап айтқанда, Сайлаукүл Отарбаеваның Қоссейіт ауылдық округінде газсыз қалған 300 тұрғыннан және Тұрысбеков ауылдық округінің Ақберді ауылында газдың жетіспеушілігі туралы шағымы айтылды. Қазыбек Иса жұмыс барысын қадағалап, осы ауылдарға газ жеткізуге жәрдемдесетініне сендірді. Жергілікті сұрақтарға Шардара ауданы әкімінің орынбасарлары Бауыржан Шомпиев пен Нұрмахан Сапаров жауап берді.

Последние новости

Контакты

Главный редактор: Мадина Жатканбаева

Тел: +7 777 471 71 40

e-mail: xaqmedia.kz@mail.ru

Свидетельство о постановке на учет периодического печатного издания, информационного агентства и сетевого издания №KZ74VPY00062329 выдано 30.12.2022

© xaqmedia.kz | Все права защищены.